வெட்டுக்கிளி இளவரசிக்கு பல் வலி !

 

வெட்டுக்கிளி இளவரசிக்கு பல் வலி !

 

1. கண் கூசாத  வெளிச்சம் மட்டுமே இருந்த நண்பகல் நேரம். பசுமையான அவரை  தோட்டம். வெண்ணிறத்தில் பூக்கள் தெரிந்தது. பார்க்கும் போதே கண்களை நிறைத்தது. வெட்டுக்கிளி இளவரசி அமைதியாக ஒரு அவரை இலையில் அமர்ந்திருந்தது. அதை சுற்றிலும் காவலர் வெட்டுக்கிளிகள் அமர்ந்திருந்தன.

ஓசனித்தலுக்கான அழைப்பிதழை பூ நாரை அனுப்பி விட்டது! என்றது சிட்டுக்குருவி.

அது பறவைகளுக்கு தானே! என கேட்டது இளவரசி.

சிறகுகளுடன் பறக்க தெரிந்த அனைவருக்குமே! தட்டாம் பூச்சிக்கும் அழைப்பிதழ் சென்று விட்டது! என்று புன்னகைத்தது சிட்டுக்குருவி.

சரி! பார்ப்போம்! என்று தோள்களை குலுக்கிவிட்டு ஒரு இலையில் அமர்ந்தது இளவரசி .

கறுக்! என்ற சத்தத்துடன் ஒரு இலையை கடித்தது . கால்வாசி தோட்டத்தை சாப்பிட்டு முடித்துவிட்டு ,ம்ம் ருசியாக இல்லை என்று அடுத்த செடியை தேடி பறந்தது !வெட்டுக்கிளி இளவரசி.

இளவரசி எந்த ருசியை  தேடறாங்களோ? என்று பணியாளர் வெட்டுக்கிளிகள் தங்களுக்குள் பேசி கொண்டன.

வெட்டுக்கிளி இளவரசி பறக்கும் போது எதிரில் இரண்டு வெட்டுக்கிளி வீரர்கள் பறந்து வந்தன.

இளவரசியை பணிவுடன் வணங்கின. 

இளவரசி நாங்கள் ஒரு ரோஜா தோட்டத்தை கண்டு பிடித்திருக்கிறோம்.

உங்களுக்கு அந்த சுவை நிச்சயம் பிடிக்கும்.

அதை இளவரசி சுவைத்து பார்த்து சொல்ல வேண்டும் ! என்று முன்னாள் வந்து நின்றது தலைமை  காவலர் வெட்டுக்கிளி.

இளவரசி ! நான் முன்னால்  செல்கிறேன் . நீங்கள் பாதுகாப்பு வலையத்தை விட்டு வெளியே வர வேண்டாம். நம்முடைய வீரர்கள் உங்களுடனேயே பாதுகாப்பிற்காக பறந்து வருவார்கள்.

ம் என்று அதிகார தொனியில் கூறியது வெட்டுக்கிளி இளவரசி.

நீள்வட்ட வடிவில் காவலர் வீரர்கள் பறந்து வந்தனர்.வெட்டுக்கிளி இளவரசி நடுவில் பறந்து வந்தது.

இளவரசி நல்ல நறுமணம் வருகிறது! நாம் ரோஜா தோட்டத்தின் அருகில் வந்து விட்டோம் ! என்றது தோழி சிட்டுக்குருவி. 

ஒரு ரோஜா இதழில் அமர்ந்தது இளவரசி. 

என்ன இது? நான் உறங்கும் மெத்தையை விட மிருதுவாக இருக்கிறதே? 

முகர்ந்து நறுமணத்தை உள்ளிழுத்து கொண்டது. மெதுவாக வாயை திறந்து கறுக் என்று கடித்தது.

அந்த சத்திற்காகவே காத்திருந்த பணியாளர் வெட்டுக்கிளிகள் வேகவேகமாக கடிக்க ஆரம்பித்தன.

ரோஜா தோட்டம் முழுவதும் கறுக் கறுக் என்ற சத்தம் மட்டுமே ஒலித்து கொண்டிருந்தது.

வெட்டுக்கிளி இளவரசி ஆ...ஆ.... என்று வலியில் கத்தியது யாருக்கும் கேட்கவில்லை.

ஒரு வழியாக கறுக் என்ற சத்தம் நின்று விட்டது.

இளவரசி கன்னத்தில் கையை வைத்து சோகமாக  அமர்ந்திருந்தது. 

என்னவாயிற்று? என்று ஓடி வந்தது சிட்டுக்குருவி.

எதுவும் பேசாமல் அமைதியாக இருந்தது இளவரசி. 

திரும்பவும் பல்வலி வலிக்கிறதா?

ஆம் என்று தலையாட்டியது இளவரசி.

வீரர்களே அரண்மனை வைத்தியரை பல்வலி மருந்தை  எடுத்து வைக்க சொல்லுங்கள்! என்று கூறியது சிட்டுக்குருவி.

உடனடியாக இரண்டு வீரர்கள் முன்னாள் பறந்து சென்றனர்.

மற்ற காவலர் வீரர்கள் சூழ அரண்மனைக்கு பறந்து சென்றது இளவரசி வெட்டுக்கிளி.

 2.

இளவரசி வெட்டுக்கிளி மெத்தையில் படுத்திருந்தது. 

ராணி வெட்டுக்கிளி வேகமாக உள்ளே வந்தது.

எத்தனை முறை கூறுவது? ருசியை  தேடி பறக்காதே  என்று? காதில் விழுகிறதா ? இல்லையா? என்று கோபமாக கத்தியது ராணி.

காது என்ன நமக்கு மனிதர்களை போல தலைக்கு அருகிலா  இருக்கிறது?

வயிற்றில் தானே இருக்கிறது. என் வயிற்றுக்கு ருசி வேண்டும் என கூறுகிறது. அது மட்டுமே எனக்கு காதில் தெளிவாக கேட்கிறது என்று புரண்டு படுத்து இளவரசி .

எல்லாம் உன் தந்தை கொடுக்கும் செல்லம் என்று தலையிலடித்துக்  கொண்டது அரசி.நேராக அரசிரிடம் சென்றது. 

நம்முடைய வெட்டுக்கிளிகள் இனத்தில் அன்னையின் கடமை  என்ன?  

ஏன் இப்படி கேட்கிறாய்? என்று பதட்டத்துடன் கேட்டது வெட்டுக்கிளி அரசர்.

பதிலை  மட்டும் கூறுங்கள் என்று கோபத்துடன் பேசியது அரசி .

பாதுகாப்பான இடத்தை தேர்வு செய்து முட்டைகளை இடுவது! என்று குழப்பமான முக பாவனையில் கூறியது அரசர் வெட்டுக்கிளி.

பிறகு?

அவ்வளவு தான். முட்டையிலிருந்து லார்வாக்கள் வெளியே வந்து வளர்ந்து தங்களுக்கான உணவை தங்கள் தேடி  உண்டு வளர வேண்டியது தான். 

ஆனால் நம்முடைய வெட்டுக்கிளி இளவரசி அப்படியா வளர்ந்தாள்?

இல்......லை! என்று இழுத்து பதில் கூறியது அரசர் வெட்டுக்கிளி.

 

காரணம்?

 

நான் தான். அதிகம் செல்லம் கொடுத்து அவளை அரண்மனையிலேயே பாதுகாப்பாக வளர்த்து விட்டேன்.

 

இப்போது அது எங்கு வந்து நின்றிருக்கிறது தெரியுமா?

 

அமைதியாக இருந்தது அரசர் வெட்டுக்கிளி.

 

எப்போது பார்த்தாலும் சாப்பிட்டு கொண்டே இருக்கிறாள். பல்வலி வேறு இருக்கிறது.. அதைப்பற்றி ஏதாவது கவலை இருக்கிறதா ? உங்களுக்கு?

 

அதற்காக தானே பல  நாடுகளை சேர்ந்த  மருத்துவர்களை வரவழைத்து இருக்கிறேன். பல விதமான பற்பசைகள் கொண்டு வந்துள்ளனர் என்று பெருமையாக கூறியது .வா அங்கே செல்வோம் என்று அழைத்து சென்றார் அரசர்.

 

3.                                                                                                                                                          

 

ஒவ்வொருவரும் தனித்தனியாக தங்களை அறிமுகம் செய்து கொண்டனர்.

 

அரசருக்கும் அரசிக்கும் எங்களுடைய வணக்கங்கள் என்று வணங்கினார்கள் வெளிநாட்டு மருத்துவர்கள்.

 

அரசே அமேலா நாட்டு பிரதிநிதி நான். எங்களுடைய கோலா பற்பசையை உபயோகித்தால் பல்வலி பறந்து போய் விடும்.

 

அரசே பிரிலா  நாட்டு பிரதிநிதி நான். எங்களுடைய செலா பற்பசையை உபயோகித்தால் பற்கள் உறுதியாகி பல்வலி பறந்து போய் விடும்.

 

அரசே யுலேலா  நாட்டு பிரதிநிதி நான். எங்களுடைய கோலாசெலா பற்பசையை உபயோகித்தால் பற்களின் ஈறுகள்  உறுதியாகி பல்வலி பறந்து போய் விடும்.

 

அரசே யுகேலா  நாட்டு பிரதிநிதி நான். எங்களுடைய பெசோலா பற்பசையை உபயோகித்தால் வெண்மையான பற்கள்  கிடைக்கும்.

 

அரசே அமெரிலா  நாட்டு பிரதிநிதி நான். எங்களுடைய ஓரலா பற்பசையை உபயோகித்தால் பல்வலி பறந்து விடும். 

 

நம்முடைய நாட்டில் யாரும் பற்பசைகளை  தயாரிக்கவில்லையா? என்று வெட்டுக்கிளி அரசி கேட்டார்.

 

இருக்கிறார்கள் அரசி ! என்று கூறினார் அமைச்சர் வெட்டுக்கிளி.

 

அரசே நம்முடைய இண்டிலா நாட்டில் தான்த்லா பற்பசையை தயாரித்துள்ளோம். இது இயற்கையில் கிடைக்கும் மூலிகைகளின் மூலம் உருவாக்கப்பட்டது.

 

அனைத்து நாட்டினரின் பற்பசைகளும் முதலில் சோதனைக்கு உள்ளாக்கப்பட்டு பிறகு இளவரசிக்கு கொடுக்கப்படும். எது பல்வலியை போக்குகிறதோ அவர்களின் நாட்டிலிருந்து பற்பசைகள் இறக்குமதி செய்யப்படும் என்று அறிவித்தது அமைச்சர் வெட்டுக்கிளி.

 

இரண்டு நாட்களுக்குள் அனைத்து பற்பசைகளை பற்றியும் எழுதிக்  கொண்டு வந்தது அமைச்சர் வெட்டுக்கிளி.

 

அரசே பற்பசைகளை உபயோகித்தால் அப்போதைக்கு வலி குறைவதை போல இருக்கிறது. ஆனால்  நீண்ட நாள் பயன்பாட்டில் பற்களின் வலிமை குறைந்து போகும் என் அரண்மனை வைத்தியர் கூறியுள்ளார்.

 

நீங்கள் கூறுவது எனக்கு புரிகிறது. ஆனால்  என் இளவரசி வலியில் துன்பப்படுவதை என்னால் பார்க்க முடியாது.

 

அனைத்தையும் இளவரசிக்கு கொடுங்கள். எது பல்வலியை சீக்கிரம் குணப்படுத்துகிறதோ அதை இறக்குமதி செய்வோம் என்றார் அரசர்.

 

இளவரசி நம்முடைய பற்பசைகள் வந்துவிட்டன என்று ஓடி வந்தது தோழி வெட்டுக்கிளி.

 

கோலா பற்பசையை முதல் நாள் பயன்படுத்தியது இளவரசி. பெரிதாக எதுவும் வித்தியாசம் தெரியவில்லை.

 

தொடர்ந்து அனைத்து பற்பசைகளையும் பயன்படுத்தியது. மேலும் பல்வலி கூடி போனது.

 

இளவரசியின் பல்வலியை குணப்படுத்துவோருக்கு பரிசுகள் வழங்கப்படும் என்று நாடு முழுவதும் விளம்பரம் செய்யப்பட்டது.

 

4. இளவரசி ! இளவரசி ! என்று மூச்சிரைக்க ஓடி வந்தது சிட்டுக்குருவி .

 

கோதுமை இலையை கடித்து கொண்டிருந்தது இளவரசி. என்ன என்பதை போல நிமிர்ந்து பார்த்தது.

 

உங்களுடைய பல்வலிக்கு முன் ஜென்ம காரணம்  இருக்கலாம் என பேச்சு பரவுகிறது!.

 

இது வேறயா ? என்று அலுத்துக்கொண்டதுது இளவரசி.

 

ஆமாம் இளவரசி ! இன்று இரவு ஒரு முனிவர் வர போகிறாராம்.

 

அவர் வந்து கதை கூற போகிறார்! அது தானே ! என்று கூறி அலட்சியமாக சிரித்தது இளவரசி.

 

அவர் கூறுவது நன்மையாகவும் இருக்கலாம் தானே ! என்று மெல்லிய குரலில் கூறியது சிட்டுக்குருவி.

 

சரி பார்ப்போம் ! எப்படியாவது இந்த பல்வலி தீர்ந்தால் போதும்! என்று பெருமூச்சு விட்டது இளவரசி.

 

அப்படியானால் அரண்மனையில் அனைவரும் முனிவரை வரவேற்பதற்காக வேலையில் மூழ்கியிருப்பார்கள் தானே!

 

ஆம் இளவரசி.

 

சரி நாம் கரூலா   நாட்டிற்கு சென்று வருவோம்.

 

தனியாகவா !

 

ஆமாம் என்று தோள்களை குலுக்கியது இளவரசி.

 

அரசருக்கு தெரிந்தால் பெரிய பிரச்சினை ஆகிவிடும்! வேண்டாம் இளவரசி.

 

நீ வரவில்லை என்றல் நானே தனியாக செல்கிறேன் என்று முகத்தை திருப்பி கொண்டது இளவரசி.

 

வேண்டாம் நீங்கள் மட்டும் தனியாக போக வேண்டாம் நானும் வருகிறேன் என்று வந்தது சிட்டுக்குருவி.

 

எவ்வளவு நிம்மதியாக இருக்கிறது இப்படி சுதந்திரமாக பறப்பதற்கு !

 

என்று மிகவும் மகிழ்ச்சியாக பறந்தது வெட்டுக்கிளி இளவரசி.

 

ஒரு சோள தோட்டத்தை கண்டதும் அதற்குள் சென்றது.சோள  கதிரை கடிக்க அமர்ந்தது இளவரசி.

 

அப்போது ஒரு பாடல் கேட்டது.

 

நான் தானே வெட்டுக்கிளி!

 

பாட்டு பாடும் வெட்டுக்கிளி!

 

பறப்பேனே நான் பறப்பேனே

 

நூற்றியிருபது மைல் தூரம் பறப்பேனே!

 

நான் தானே வெட்டுக்கிளி!

 

பாட்டு பாடும் வெட்டுக்கிளி!

 

பாடல் வந்த திசையை நோக்கி பறந்தது இளவரசி, கூடவே  தோழியும் சென்றது.

 

யார் படுகிறார்கள்?

 

ஏதோ ஒரு ஆண்  வெட்டுக்கிளி போல என்றது தோழி!

 

அது எப்படி பார்க்காமலேயே கூறுகிறாய்?

 

 வெட்டுக்கிளி இனத்தில் ஆண் வெட்டுக்கிளிகளால் மட்டுமே பாட இயலும் இளவரசி.

 

ம்ம்! இரவில் தூங்கும் போது இதை போன்ற பாடலை கேட்டால் நன்றாக இருக்கும்! என்றது இளவரசி!

 

இளவரசி பகலில்  மட்டுமே ஆண்  வெட்டுக்கிளிகள் பாடும்! என்றது தோழி.

 

என்னுடைய  இனத்தை பற்றி நான்  அறிந்து கொள்ள வேண்டியது  நிறைய இருக்கிறது!  என்று சிந்தனையுடன் கூறியது இளவரசி.

 

இவர்களை பார்த்ததும் ஆண் வெட்டுக்கிளி பாடுவதை நிறுத்தியது.

 

நன்றாக பாடுகிறீர்கள்.!

 

இங்கே தான்  இருக்கிறீர்களா? என்று கேட்டது வெட்டுக்கிளி இளவரசி .

 

ஆண் வெட்டுக்கிளி திரு திருவென  விழித்தது . சட்டென்று எம்பி குதித்து பறந்து மறைந்தது.

 

இளவரசி நாம் செல்லலாம்! நேரமாகிறது! என்றது சிட்டுக்குருவி.

 

இருவரும் அரண்மனையை நோக்கி பறந்தனர்.

 

 

 

5. அரசர் , அரசி, அமைச்சர் என அனைவரும் முனிவரின் முன்னாள் அமர்ந்திருந்தனர்.

 

முனிவர் வெட்டுக்கிளி கண்களை மூடி அமர்ந்திருந்தது.

 

இளவரசி மெதுவாக வந்து அமைதியாக அமர்ந்தது.

 

முனிவர் வெட்டுக்கிளி கண்களை திறந்து பார்த்தது.

 

அமைச்சர் பேசினார்!.

 

முனிவருக்கு வணக்கம்! எங்களுடைய வெட்டுக்கிளி இளவரசியின் பல்வலிக்கு காரணம் என்ன? அனைத்து மருத்துவ முறைகளையும் செய்து பார்த்து விட்டோம்!. எதுவும் குணமாக்கவில்லை.

 

ம்ம் என்றது முனிவர் வெட்டுக்கிளி.

 

ஒருவேளை முன் ஜென்ம செயலின் காரணமாக இருக்கலாமோ என்ற அச்சம் வந்திருக்கிறது.

 

ம்ம் என்றது முனிவர் வெட்டுக்கிளி.

 

நீங்கள் அதை பற்றி கூறினால் இளவசியின் எதிர்காலம் நல்லபடியாக இருக்கும் என்று வணங்கியது அமைச்சர் வெட்டுக்கிளி.

 

முனிவர் பேச ஆரம்பித்தார்.

 

முன்னொரு காலத்தில் இளவரசி பாலைவன வெட்டுக்கிளியாக இருந்தது. அப்போது உணவை தேடி தன்னுடைய குழுவினருடன் மிக நீண்ட  தூரம் பயணம் செய்தது.

 

அந்த கூட்டம் சூரியனையே மறைக்கும் அளவிற்கு இருந்தது. கரு மேகம் வேகமாக பறந்து செல்வதை போல அந்த கூட்டம் பாலைவனத்தை கடந்தது.

 

அவ்வளவு பெரிய கூட்டமா? என்று கேட்டது அரசி.

 

ஆம் கிட்டத்தட்ட பதினைந்து  கோடி! வெட்டுக்கிளிகள் இருக்கும்.

 

அங்கிருந்த அனைவரின் கண்களும் ஆச்சர்யத்தில் விரிந்தன.

 

வரும் வழிகளில் இருக்கும் தோட்டங்களை எல்லாம் முழுவதுமாக உண்டு விட்டு வந்தன.

 

அதனால் அந்த நாடுகளில் எல்லாம் பஞ்சம் ஏற்பட்டது.

 

வெட்டுக்கிளிகள் சாப்பிடுவதால் பஞ்சம் உருவாகுமா? என்று வியப்புடன் கேட்டது அமைச்சர் வெட்டுக்கிளி.

 

ஆம் ... முப்பத்தியந்தாயிரம் மக்கள் ஒருநாளைக்கு உண்ணக் கூடிய அளவு பயிர்களை  அந்த வெட்டுக்கிளிகளால்  உண்ண முடியும்.

 

அமைச்சர் வெட்டுக்கிளி அப்படியே அதிர்ச்சியில் நின்றது.

 

பயிரிட்ட விவசாயிகள் கண்ணீர் வடித்தனர். அதில் ஒரு விவசாயி கோபத்தில் வெட்டுக்கிளிகளை பார்த்து கோபமாக கத்தினார்.

 

 பஞ்சத்தை ஏற்படுத்திய வெட்டுக்கிளிகளுக்கு இனி எதுவும் சாப்பிட முடியாமல் பல்வலி வரட்டும்! என்று கூறி விட்டார்.

 

அரசர் வெட்டுக்கிளி நிமிர்ந்து உட்கார்ந்தது.

 

அதனால்  தான் நம்முடைய இளவரசிக்கு பல்வலி வந்திருக்கிறது ! என்று கூறினார் முனிவர்.

 

எப்போதோ நான் செய்ததற்கு இப்போது ஏன் பல்வலி வர வேண்டும்? என்று ஆற்றாமையுடன் கேட்டது வெட்டுக்கிளி இளவரசி .

 

நம்முடைய செயல்களுக்கான விளைவை நாம் அனுபவித்தே ஆக வேண்டும் இளவரசி!. அது எத்தனை  காலம் ஆனாலும் நடந்தே தீரும் ! என்றார் முனிவர்.

 

இதற்கு என்னதான் தீர்வு? என்று கேட்டது  அரசர் வெட்டுக்கிளி.

 

அரசே நம்முடைய செயல்களை நல்லவிதமாக மாற்றிக்  கொண்டால் அனைத்துமே உடனடியாக மாறி  விடும். அதை உணர்ந்து கொள்ளாதவர்கள் முன்ஜென்ம விளைவை அனுபவித்தே ஆவார்கள்!என்றது முனிவர் வெட்டுக்கிளி!

 

இப்போது நான் என்ன செய்ய வேண்டும்? என்று கேட்டது வெட்டுக்கிளி இளவரசி.

 

தேவைக்கு அதிகமாக சாப்பிட  கூடாது! அவ்வளவு தான் என்றது முனிவர் வெட்டுக்கிளி!

 

நான் எவ்வவளவு சாப்பிட வேண்டும் என கூறுவதற்கு யாருக்கும் உரிமை இல்லை! என்னுடைய பல்வலி இருந்து விட்டு போகட்டும் ! என்று கோபத்துடன் வெளியே சென்றது வெட்டுக்கிளி இளவரசி.

 

அரசரும், அரசியும் முனிவர் வெட்டுக்கிளியிடம் மன்னிப்பு கேட்டனர்.

 

முனிவர் வெட்டுக்கிளி புன்னகைத்தது.

 

 

 

6. இரவெல்லாம் தூங்காமல் யோசித்து கொண்டே படுத்திருந்தது வெட்டுக்கிளி இளவரசி. நிலவு  இல்லாமல் வானம் நட்சத்திரங்களுடன் இருந்தது. நட்சத்திரங்களை எண்ணியவரே உறங்கியது இளவரசி.

 

சூரியன் உதித்த சிறிது நேரத்திற்கு பிறகு தோட்டத்தில் இருந்து பாடல் வந்தது.

 

நான் தானே வெட்டுக்கிளி!

 

பாட்டு பாடும் வெட்டுக்கிளி!

 

வந்தேனே வந்தேனே!

 

பதில் கூற  வந்தேனே!

 

வெட்டுக்கிளி இளவரசி எம்பி குதித்து தோட்டத்திற்குள் பறந்து சென்றது.

 

அங்கே ஆண் வெட்டுக்கிளி பாடிக்கொண்டிருந்தது.

 

நீ மட்டும் எப்படி மகிழ்ச்சியாக இருக்கிறாய் ? என்று கேட்டது இளவரசி.

 

மகிழ்ச்சியாக இருப்பது தானே இயல்பு என்று வியப்புடன் கூறியது ஆண் வெட்டுக்கிளி.

 

ஆமாம் ! உனக்கு பல் வலி இல்லை அதனால் மகிழ்ச்சியாக இருக்கிறாய் ! என்று சோகமாக கூறியது இளவரசி.

 

ஒஹோ ! உன்னுடைய சோகத்திற்கு காரணம் பல்வலி தானா?

 

ஆம் ! ஒரு நாளும் தீராதது .

 

 நான் சொல்வதை கேட்டால் ,  ஒரு வாரத்தில் பல்வலி சரி ஆகி விடும் !

 

உண்மையாகவா?

 

என்னுடன் வா! என்று பறந்து சென்றது ஆண் வெட்டுக்கிளி.

 

ஒரு மரத்தின் இலைகளில் அமர்ந்தது. இதில் ஒரு இலையை சாப்பிடு.

 

நீ ஒரு நல்ல நண்பன். எனக்கு உணவு பிடிக்கும் என்பதை நன்றாக அறிந்து வைத்திருக்கிறாய்! என்று மகிழ்ச்சியாக இலையை ஒரு கடி கடித்தது.

 

வாய்  முழுவதும் கசப்பு  பரவியது!. கசக்கிறது என்று எம்பி குதித்தது வெட்டுக்கிளி இளவரசி.

 

முழுவதுமாக சாப்பிடு!

 

என்னால் முடியாது! அப்படி என்றால் பல்வலியோடு தான் இருக்க வேண்டும்!

 

சிறிது நேரம் யோசித்தது இளவரசி.

 

ஒரு வாரம் சாப்பிட்டால் சரி ஆகி விடும் தானே?

 

ஆமாம் .

 

அப்படி என்றால் ஒரு வாரத்திற்கான வேப்பிலைகளை இப்போதே சாப்பிட்டு முடித்து விடுகிறேன்! என்றது இளவரசி

 

ஆண் வெட்டுக்கிளி சிரிக்க ஆரம்பித்தது.

 

எதற்காக சிரிக்கிறாய்?

 

உன்னுடைய பிரச்சினையே இது தான். மொத்தமாக அனைத்தையும் உண்பது.

 

சரி சிரிப்பதை நிறுத்து! நான் என்ன செய்ய வேண்டும்?

 

தினமும் காலையில் முதலில் ஒரு வேப்பிலையை உண்டு விட்டு மற்ற உணவை சாப்பிடு.

 

மற்ற உணவை நிறைய சாப்பிடலாம் தானே .

 

ம்ம் நிறைய சாப்பிடலாம் என்றது ஆண் வெட்டுக்கிளி.

 

சரி என்று ஒரு முழு வேப்பிலையை உண்டு விட்டு பறந்தது இளவரசி.

 

தொடர்ந்து ஏழு நாட்கள் இதை செய்தது.

 

முதலில் வேப்பிலையை சப்பிடுவதால் வாயில் கசப்பு தங்கியது. அதனால் மற்ற உணவுகளை நிறைய சாப்பிட முடியாமல் போனது.

 

ஒரு வாரத்தில் பல்வலி பறந்து போனது! முகத்தில் மகிழ்ச்சி  ததும்பியதால் வெட்டுக்கிளி இளவரசி மிகவும் அழகாக மாறியது.

 

7. ஆண்  வெட்டுக்கிளியும் , வெட்டுக்கிளி இளவரசியும் வேப்பிலையில் அமர்ந்து மகிழ்ச்சையாக பேசி கொண்டிருந்தனர்  , . 

அதை பார்த்து கொண்டிருந்த பணியாளர் வெட்டுக்கிளிகள் தங்களுக்குள் பேசி கொண்டன.

 

எப்படியோ நம்முடைய இளவரசிக்கு ருசி என்பது என்னவென்று தெரிந்து விட்டது!.

 

கசப்பு தான் இளவரசி தேடிக்கொண்டிருந்த ருசியா?

 

இல்லை , இல்லை அளவாக உண்பதால் மட்டுமே ருசியை  உணர முடியும்!என்பதை அறிந்து கொண்டார்கள் நம் இளவரசி என்று கூறியது இன்னொரு பணியாளர் வெட்டுக்கிளி.

 

அளவு தான் ருசியை  கூட்டும் ! என்று கூறி புன்னகைத்தது  மற்றொரு பணியாளர் வெட்டுக்கிளி.

 

நான் தானே வெட்டுக்கிளி!

 

சிரிக்க வைக்கும்  வெட்டுக்கிளி!

 

பறப்பேனே நான் பறப்பேனே

 

வேப்பிலை சாப்பிட பறப்பேனே !

 

நான் தானே வெட்டுக்கிளி!

 

பல்வலி இல்லாத வெட்டுக்கிளி !

 

பாட்டு பாடும் வெட்டுக்கிளி!

 

என்று ஆண் வெட்டுக்கிளி பாட ஆரம்பித்தது.

 

-    Manobharathi Vigneshwar