பெண் குயிலின் சிவில் இன்ஜினியரிங்
காலேஜ் .....
சூரியன் வானத்தில் உச்சியில் இருந்தது. ஆனாலும் வெயில் அதிகமாக இல்லாத
நண்பகல் நேரம்.
தான் கட்டி முடித்த கூட்டை பார்த்து உற்சாகமாக பாடிக் கொண்டிருந்தது தேன் சிட்டு.
சின்ன சின்ன
பஞ்சு சேர்த்து
தேங்காய் நாரும்
கொஞ்சம் சேர்த்து
சிட்டு சிட்டாய்
பறந்து வந்து
குட்டி கூடு கட்டுவேனே !
சிட்டு சிட்டாய்
பறந்து வந்து
குட்டி கூடு கட்டுவேனே !
உன்னுடைய கூடு மிகவும் அழகாக இருக்கிறது என்றது பெண் குயில் .
அப்போது கரிய நிறத்திலும், சற்று நீளமாகவும் , இருந்த ஒரு பூச்சி பறந்து
வந்தது . ஒரு சில விநாடிகளில் இலையை "ப" வடிவில் வெட்டி எடுத்துக்கொண்டு
பறந்து சென்றது.என்ன பூச்சி இது ? என ஆச்சரியப்பட்டு குயிலும், தேன்சிட்டுவும்
அதன் பின்னாலேயே பறந்து சென்றன .
ஈரமான களிமண், மரப் பிசின் போன்ற பொருட்களால் ஒரு கூடு இருந்தது. வெட்டிக் கொண்டு
வந்த இலைகளைக் கூட்டின் வடிவத்துக்கு ஏற்ப அவற்றைச் சுருட்டி உள்ளே வைத்தது.
என்ன இது? தையல் சிட்டுவின் இலைக்கூடு போலவே இருக்கிறது? என அந்த பூச்சியிடம் கேட்டது பெண் குயில்.
நாங்கள் இலைவெட்டு தேனீக்கள் . நாங்களும் இலைக்கூடு தான் கட்டுவோம்! என்றது அந்த
பூச்சி.
என்னது நீங்கள் தேனீக்களா? தேனீக்கள் மெழுகால் தானே அறுங்கோண வடிவில் கூடு
கட்டும்? என கேட்டது தேன் சிட்டு.
நாங்கள் தனித்து
வாழ்பவர்கள். எங்களுக்கு கூட்டமாக சமூக
வாழ்க்கையில் ஈடுபடுவதில் விருப்பம் இல்லை! என்றது இலைவெட்டு தேனீ.
ம்ம்ம் ! பூச்சிகள் கூட கூடு கட்டுகின்றன! ஆனால் இந்த மலைமுழுங்கான் கூடு கட்டுவதில்லை! மர பொந்தில் தான்
வசிக்கிறது ! என்றது பெண் குயில். !
அவ்வளவு பெரிய வாயை வைத்திருக்கிறது.! கூடு கட்டாதா? என்று ஆச்சர்யப்பட்டது
தேன் சிட்டு.
ஆமாம்! கிளி கூட பொந்தில் தானே வசிக்கிறது! என்றது இலை வெட்டு தேனீ.
தீடிரென உத்வேகம் கொண்டு , நான் ஒரு சிவில் இன்ஜினியரிங் காலேஜ்
ஆரம்பிக்க போகிறேன் என்றது பெண் குயில்.
என்னது குயில் நடத்தும் சிவில் இன்ஜினியரிங் காலேஜா? என்று கண்களை
விரித்தது குடுமி எழால்.
கூடே கட்டாத நீ எப்படி சிவில் இன்ஜினியரிங் காலேஜ் நடத்துவாய் ? என்று கேட்டது பாறுகழுகு.
நான் தான் அனைத்து குருவிகளின் கூடும் பார்க்கிறேனே! எனக்குத் தானே கூடுகளை
பற்றிய அறிவு நிறைய இருக்கும்? என்று கர்வத்துடன் கூறியது குயில்.
ஆமாம்! ஆமாம்! நிறைய பறவை கூடுகளை பரிசோதித்து பாதுகாப்பான கூட்டில் தான் பெண் குயில் முட்டைகளை
இடும்! என்றது குடுமி எழால்.
இந்த செய்தி விரைவாக காகங்களின் கூட்டத்தில் பரவியது.
அடடா! மிகவும் நல்ல விஷயமாக இருக்கிறது. இனி நம்முடைய கூட்டில் குயில் முட்டையிடாது ! என்று மகிழ்ச்சி அடைந்தன காகங்கள்.
பெண் குயில் மிக தீவிரமாக தேடி பல பறவைகள், குருவிகள், பூச்சிகள் என
அனைத்து கூடுகளையும் தெரிந்து கொண்டது. பிறகு சிந்தித்து வகுப்புகளையும் , அதற்கான
ஆசிரியர்களையும் வடிவமைத்தது .
விளம்பர பலகைகள் பரவலாக வைக்கப்பட்டன.
பெண் குயிலின் சிவில் இன்ஜினியரிங் காலேஜ் :
துறைகள்:
1. டிப்ளமோ இலைக்கூடு - இலைவெட்டு தேனீ
2. இளங்கலை இலைக்கூடு - தையல்சிட்டு
3. முதுகலை இலைக்கூடு - மிசிறுகள்
4. முதுகலை மரப்பொந்து - மலைமுழுங்கான்
5. முதுகலை நார்க்கூடு - தூக்கணாங்குருவி
வகுப்புகள் நடைபெறும் இடம்: குருவிக்கல் பாறை.
விளம்பரங்களை படித்த பறவைகளின் கூட்டத்தில் பெரிய விவாதங்கள் உருவாயின.
மிசிறுகள் என்பது யார்?
எனக்கு தெரியும் ! எனக்கு தெரியும் என்றது அசுவினிப்பூச்சி .
அட! அசுவினிப்பூச்சியே ! உனக்கு எப்புடி மிசிறுகள் பற்றி தெரியும்? என்று
கேட்டது பாறுகழுகு.
எறும்புகளை பற்றிய அனைத்து விஷயங்களும் எங்களை தவிர வேறு யாருக்கு
தெரியும்? என்று நெற்றியை உயர்த்தி பேசியது அசுவினிப்பூச்சி.
என்னது மிசிறுகள் என்பது எறும்புகளா? என ஆச்சர்யபட்டது எழால் பறவை.
செவப்பாக இருக்குமே!
செவ்வெறும்பு என பெயராம்!
பெருசாக இருக்குமே
ராணி எறும்பு தான் தலைவியாம் !
செவ்வெறும்புகள் ஒன்று கூடி
கட்டிடுமாம் இலைக்கூடு
செவ்வெறும்புகள் ராஜ்யமாம்
மிசிறுகள் என்பது அதன் பெயராம்!
என ஆடி கொண்டே பாடியது அசுவினிப்பூச்சி.
நான் மிசிறுகளின் வகுப்பில் சேர போகிறேன் ! என வந்து அமர்ந்தது பச்சை கிளி.
மிசிறுகளின் இலைக்கூடு உனக்கு எப்படி பொருத்தமாகும்? என கேட்டது பாறுகழுகு.
என்னுடைய நிறம் பச்சை ! இலைகளின் நிறமும் பச்சை! இலைகூட்டில் நான் மிகவும்
பாதுகாப்பாக இருப்பேன்! என்றது கிளி.
அப்படியானால் நான் தூக்கணாங்குருவியின் வகுப்பில் சேர போகிறேன் என்றது
குடுமி எழால் பறவை.
நான் இலைவெட்டு தேனீயின் வகுப்பில் சேர போகிறேன் என்றது அசுவினிப்பூச்சி.
பறவைகளின் முடிவை கேட்டு புன்னகைத்தபடி பறந்து சென்றது பொகுவல் பறவை.
பெண் குயிலின் சிவில் இன்ஜினியரிங் காலேஜில் வெளிநாட்டு பறவைகள் கூட
கற்றுக்கொள்ள ஆரம்பித்தன.
பூ நாரையிடம் இருந்து அழைப்பு வந்து விட்டது. ஓசனித்தலுக்கு முன் நம்முடைய வேலைகள் அனைத்தையும் முடித்து விட வேண்டும்! என்றது பெண் குயில்.
ஆசிரியர்களும், மாணவர்களும் விரைந்து செயலாற்ற தொடங்கினார்கள்.
வகுப்புகள் முடிந்து மாதிரி தேர்வுகள் நடை பெற்றன.
மிசிறுகளின் வகுப்பில் கற்று கொண்ட இலை கூட்டை அப்டியே கட்டியது பச்சை
கிளி.
தூக்கணாங்குருவியின் கூட்டை மிக அழகாக கட்டி முடித்து குடுமி எழால் பறவை
பெருமையோடு நின்றது.
இலை வெட்டு தேனீயின் , கூட்டை சிரமப்பட்டு கட்டி முடித்தது
அசுவினிப்பூச்சி.
வகுப்புகள் முடிந்ததும் பறவைகள் தங்களின் இருப்பிடங்களுக்கு பறந்து சென்றன.
பச்சை கிளி நான் தானே!
பச்சை கிளி நான் தானே!
மிசிறுகள் தான் என் குருவாம்!
மிசிறுகள் தான் என் குருவாம்!
கட்டுவேனே இலை கூடு !
கட்டுவேனே இலை கூடு !
பச்சை நிறமாம் என் கூடு
பதுங்கி இருப்பேனே உள்ளுக்குள்ளே !
என பாடி கொண்டே இலை கூட்டை கட்டி முடித்தது கிளி.
நாளை காலையில் சூரிய உதயத்தின் போது கூட்டுக்குள் செல்லலாம் என முடிவு
செய்தது.
அடுத்த நாள் சூரியன் உதயமாகும் போது கிளி இலை கூட்டின் உள்ளே செல்ல
முயற்சித்தது. ஆனால் முடியவில்லை! வெயில் ஏறி கொண்டே சென்றது. ஆனாலும் கிளியால்
கூட்டுக்குள் செல்ல முடியவில்லை.
சோர்வாக அமர்ந்திருந்தது.
பச்சை கிளியே! என்னால் தூக்கணாங்குருவியின் கூட்டில் வாழ முடியவில்லை என்று
பதட்டத்தோடு கூறியது குடுமி எழால் பறவை.
என்னால் கூட தான் இலை வெட்டு தேனீயின் இலை கூட்டுக்குள் வாழ முடியவில்லை!
என்று சலிப்புடன் கூறியது அசுவினி பூச்சி!
இந்த பெண் குயில் நமக்கு சரியான ஆசிரியர்களை அமைத்து கொடுக்கவில்லை! அதனால் தான் இவ்வளவு
பிரச்சினையும்! என்று கோபமாக பேசியது கிளி.
எனக்கென்னவோ நாம் தான் நமக்கான கூட்டை கற்றுக்கொள்ளவில்லை என தோன்றுகிறது
என்றது அசுவினி பூச்சி.
சிறிது நேரம் அமைதி நிலவியது!
மெதுவாக வந்தமர்ந்தது பொகுவல் பறவை. மேற்கு மலைப்பக்கம் இருக்கும்
தென்னத்தோப்பில் நெறய மர பொந்துகள் உள்ளன! என்று செய்தி கூறியது.
பச்சை கிளி நான் தானே !!
மர பொந்து தான் என் கூடே !
என்று பாடிய படி பறந்து சென்றது கிளி.
அதை பார்த்து குடுமி எழால் பறவையும் புரிந்து கொண்டு
மலை சரிவுகள் தான் என் கூடு!
என் மரபு அது தானே!
மலை சரிவுகள் தான் என் கூடு!
என் மரபு அது தானே!
என மகிழ்ச்சியாக வாழ ஆரம்பித்தது குடுமி எழால் பறவை.
பெண் குயிலின் சிவில் இன்ஜினியரிங் காலேஜில் இப்போதும் நிறைய பறவைகள்
கற்றுக்கொண்டிருந்தன.
ஆனால் குயில் எப்போதும் போல , காகங்களின் கூட்டில் முட்டைகளிட்டு
வாழ்ந்தது.
-
Manobharathi Vigneshwar